Մարդկային իրաւանց սուրիական դիտարանը կը հաղորդէ, որ տասնեակ մը զոհեր, որոնց կարգին 11 մանուկներ, խեղդամահ եղած են Սուրիոյ Իտլիպ նահանգի Խան Շէյխուն շրջանը թունաւոր կազեր պարունակող ռումբերով ռմբակոծուելուն իբրեւ հետեւանք: Ռմբակոծումը կատարած են ռազմական օդանաւեր, որոնց սուրիական կամ ռուսական ըլլալը կարելի չէ եղած ճշդել, նաեւ չէ բացայայտուած, որ ի՛նչ տեսակի թունաւոր նիւթեր կը պարունակէին ռումբերը:
Ռմբակոծումի եւ կործանումի ենթարկուած է նաեւ այն հիւանդանոցը, ուր փոխադրուած էին այս պատճառով վիրաւորուած հարիւրաւոր քաղաքացիներն ու մանուկները, որոնք կը բուժուէին եւ փորձ կը կատարուէր անոնց կեանքը փրկելու:
Սուրիական զինուորական աղբիւրներ «Ռոյթըրզ»-ին յայտնած են, որ սուրիական բանակը քիմիական կամ թունաւոր ո՛չ մէկ նիւթ օգտագործած է անցեալին, ո՛չ ալ կ’օգտագործէ այսօր` շեշտելով, որ նման բան պիտի չպատահի նաեւ ապագային: Բանակի ղեկավարութիւնը հաստատած է, որ սուրիական բանակը վեհանձն է, եւ անկարելի է, որ որեւէ պարագայի դիմէ նման ահաւոր եւ սահմռկեցուցիչ ոճրային արարքի մը:
«Ռոյթըրզ»-ի համաձայն, ՄԱԿ-ի Ապահովութեան խորհուրդը այսօր` չորեքշաբթի, 5 ապրիլին, առաւօտեան ժամը 10:00-ին (Նիւ Եորքի ժամանակացոյցով) ժողով պիտի գումարէ` քննարկելու Իտլիպի մէջ տեղի ունեցած ահաւոր ոճիրը:
Իտլիպի բնակիչներուն օժանդակութեան հասնելու նպատակով ՄԱԿ 18 բեռնատար օգնութիւն ուղարկած է շրջան:
Քիմիական զէնքերու գործածութեան կասեցման կազմակերպութիւնը իր խորին մտահոգութիւնը յայտնած է Խան Շէյխունի վրայ ինկած թունաւոր նիւթեր պարունակող ռումբերուն պատճառած ահաւոր աղէտին գծով:
All the contents on this site are copyrighted ©. |